తెలుగు గుమ్మానికి పాటలతో తోరణం కడదాం రమ్మని ఒక్క పిలుపు వినబడగానే ముఖపుస్తకంలో తమని చూసుకుంటున్న తెలుగువాళ్ళు చాలామందికి కొత్త ఉత్సాహం వచ్చింది. కొద్దిగంటల వ్యవధిలోనే అందులో తమ పేరు నమోదు చేస్తున్న సభ్యుల సంఖ్య చూస్తే ఈ విషయం తెలుస్తోంది.
ఎక్కడైనా తెలుగు మాట వినబడితేనే పులకరించిపోయే స్థితి కలిగే దుస్థితి త్వరలో వస్తుందేమో నని దిగులుగా ఉంటోంది ఇటీవల చాలామందికి. తెలుగు మాటే కాదు, తెలుగులో పాటలు కూడా రాయాలన్న సరదా, రాసే సత్తా కూడా ఉన్న యువతరం ఎంతో ఉత్సాహంగా ఉందని, అవకాశం దొరికినప్పుడు తప్పకుండా స్పందిస్తారని నిరూపిస్తున్నారు ఈ తెలుగు పాటల తోరణం సభ్యులు.
కవిత్వం అంటే కేవలం ప్రాసలు, పడికట్టుపదాలు వేస్తు వాక్యాన్ని ముక్కలు ముక్కలుగా విరిచి చెప్తే చాలనే అభిప్రాయం కొందరికి ఉంది. అల్లాటప్పాకవితలు చెప్పడమే ఓ గొప్పా అనే మాటదీనికి వర్తిస్తుందేమో కానీ నిజంగా భాష పట్ల, సాహిత్యం పట్ల గౌరవం ఉన్న వారు చెప్పే భావాత్మకమైన చిన్న వాక్యం కూడా గొప్ప కావ్యం ఇచ్చే అనుభూతిని ఇవ్వగలదు. వాక్యం రసాత్మకం కావ్యం అన్న మాట ఇటువంటి కవిత్వం పట్ల సార్థకమవుతుంది.
వెయ్యేళ్ళ మన తెలుగు సాహిత్యంలో నన్నయ నుంచి గురజాడ వరకు చూస్తే పద్యం - అత్యంత జనాదరణ పొందిన సాహిత్యప్రక్రియ. అనేక సాంఘిక,రాజకీయ,ఆర్థిక కారణాల వలన తెలుగు దేశంలో కూడా భాష, సాహిత్యంలోకూడా మార్పు వచ్చింది. జనం మాట్లాడే భాషే, రాసే భాష కావాలనే వాదం ఊపందుకుంది. దీని ప్రభావం కవిత్వం మీద కూడా కనిపించింది. భావకవిత అనేవిధానం సాహిత్యంలో సంచలనం కలిగించింది. సంస్కృతపదాల మాయనుంచి విడిపడి ప్రతి భావాన్ని తెలుగులో చెప్పడానికి కావలసిన చక్కని పదజాలాన్ని మనకు అందించారు ఈ భావకవులు.
తెలుగులో చలన చిత్రాలు నిర్మించిన కొత్తలో ఇతరభాషలకు అనువాదాలుగా వచ్చిన కొన్ని చిత్రాలలో తెలుగుదనం కొంత కొరవడినా క్రమంగా తెలుగు సమాజంలో భావకవులుగా జనాదరణ పొందిన కవులు చాలామంది చిత్రసీమలో ప్రవేశించడం వలన సినిమా పాటలు కూడా పెద్దగా పాండితీ ప్రకర్ష లేని సామాన్యులు పాడుకోగలిగిన పాటలుగా, గుర్తుపెట్టుకోగల సాహిత్యంతో కనిపిస్తాయి.
క్రమంగా సమాజంలో వచ్చిన మార్పులు అనేకరంగాలలో ప్రభావం చూపినట్టే సినిమారంగం మీదకూడా చూపాయి. జనం కోరినది తీస్తున్నామని, వింటున్నది రాస్తున్నామని, నచ్చినదే ఇస్తున్నామని నమ్మబలుకుతూ సినీ రంగం విలువలకు తిలోదకాలిచ్చింది. సాహిత్యంలో కూడా విలువలు నానాటికీ దిగజారాయి.
కానీ రోజులు ఎప్పుడూ ఒకేలా ఉండవు. పెరుగుట విరుగుట కొరకే అన్న సూక్తిలో నిజం ఉంది. కాలం దానిని నిరూపిస్తుంది కూడా.
కొంతకాలం క్రితం వరకు ఎంతో విలువైన కవిత్వం రాసిన వాళ్ళు ఎంతో మంది ఉండిఉండవచ్చు. కానీ సమాచార రంగంలో వ్యాపారాన్నిమాత్రమే చూసిన కొన్ని పత్రికల ధోరణి వలన చాలామంది మంచి రచనలు మరుగున పడిపోయి ఉంటాయన్న విషయంలో అనుమానం లేదు.
కానీ ఇప్పుడు రోజులు మారాయి. సమాచారరంగంలో అద్భుతమైన మార్పులెన్నో చోటుచేసుకున్నాయి. మన అభిప్రాయాలను, ఆలోచనలను పదిమందితో పంచుకోవడానికి, మంచిచెడులను బేరీజు వేసుకోవడానికి ఇదివరకులా పత్రికలు మాత్రమే వేదికలు కాదిప్పుడు. అంతర్జాలరంగంలో ప్రతివారికి ఎన్నో అవకాశాలు.
కంప్యూటర్లో రాయడం అంటే ఇంగ్లీషు తెలిసిన వాళ్ళే చేయాలనే దురభిప్రాయాన్ని పక్కన పెట్టి మాతృభాషలో మన ఆలోచనలు పంచుకోగలిగే అవకాశాలు ఎన్నో ఉన్నాయి అన్న విషయాన్ని తెలుసుకోవాలి. ఆ విషయం మనకి తెలిసిన తర్వాత మరికొంత మందికి చెప్పాలి. వీటికి కావలసినదల్లా కొద్దిగా ఓర్పు, సహనంతో చూపే నేర్పు, మరికొంత నిజమైన భాషాభిమానం. తప్పులు లేకుండా తెలుగు రాయడానికి మనస్ఫూర్తిగా చేసే ప్రయత్నం.
అంతర్జాలంలోని సాంకేతిక రంగం మనకు ఇచ్చిన గొప్పబహుమతి ఈ సమాచారమార్పిడి. ప్రపంచంలో ఏమూల ఉన్నా తక్షణం స్పందించే అవకాశం, మన అభిప్రాయాలను మనం కోరిన వ్యక్తికి వినిపించగల గొప్ప సాధనాలు ఇప్పుడు మన అరచేతిలో ఉన్నాయి. వీటిని ఉపయోగించుకుందాం.
ఇప్పుడు ఈ తెలుగు పాటల తోరణం గుంపు - మీరు రాసిన కవితలను పదిమంది కాదు.....కొన్ని వందల, (వేలమంది?) తో పంచుకోవడానికి ఒక చక్కని అవకాశం.
మీలో కొందరు ఇదివరకే కవిత్వంలో అందె వేసిన చెయ్యి అయి ఉంటారు.
మరికొందరు ఔత్సాహికులు అయి ఉంటారు. రాయాలనే తపన ఎంతో ఉన్నా భావానికి రూపం కల్పించడంలో కొంత తికమక ఉండవచ్చు వీరి కవితలలో.
అయితే ఏం....
మొత్తంమీద తెలుగు భాషమీద గౌరవంతో, తెలుగు పాటమీద సరదా తోను ఈ వేదికమీదకు చేరిన వాళ్ళం కనుక మన అభిప్రాయాలన్నీ ఇచ్చిపుచ్చుకుందాం. ఒకరి భావాలనొకరు గౌరవించుకుందాం.
నచ్చితే మెచ్చడమే కాక నచ్చకపోతే కారణాన్ని కూడా సున్నితంగా చెప్పుకుందాం.
అలా చెప్పిన వారి మాటలోని భావాన్ని నొచ్చుకోకుండా పుచ్చుకుందాం.
మన కవితా శైలిని మెరుగుపరుచుకోవడానికి ఎన్ని అవకాశాలు ఉన్నాయో ఈ వేదిక నిరూపిస్తుందని ఆశిద్దాం.
తెలుగులో గేయాలు రాసేవాళ్ళయితే ఇక్కడ ఉన్నవారితో మీ అభిప్రాయాలు పంచుకోండి.
